Fréttabréf Síðuskóla

Nú er marsmánuður runninn upp og enn eitt fréttabréfið lítur dagsins ljós. Það er vor í lofti og ótrúlega gaman að sjá sólina hækka á lofti. Þann 21. mars er útivistardagur skólans ráðgerður, þann dag förum við með alla nemendur skólans í Hlíðarfjall. Það er vonandi að veðurguðirnir verði með okkur í liði þetta skólaárið og við komumst í fjallið á ráðgerðum degi. Við sendum nánari upplýsingar heim þegar nær dregur.

Þann 1. mars hófum við 100 miða leikinn sem er árlegur viðburður í skólastar¦nu. Leikurinn stendur yfir í tvær vikur og er markmiðið með honum að hvetja nemendur til að fara eftir SMT skólareglunum. Starfsmenn gefa 10 nemendum á dag sérstaka hrósmiða sem eru settir á spjald með reitum merktum frá 1 til 100. Búið er að velja vinningsröð á spjaldinu og kemur svo í ljós í lok leiks hvaða nemendur eru í vinningsröðinni.

Við viljum hvetja ykkur foreldrana að gera eitthvað skemmtilegt með árgöngunum. Það er hægt að vera í salnum hér í skólanum ef hann er laus og síðan eiga einhverjir árgangar peninga inn á reikningi. Við höfum einnig lánað salinn fyrir afmæli ef öllum hópnum er boðið.

Bestu kveðjur úr skólanum,

Ólöf, Malli og Helga

Í morgun voru nemendur í 8. bekk í skapandi skrifum þar sem unnið er með söguna Vertu ósýnilegur. Sú saga fjallar um Ishmael, dreng frá stríðshrjáðu landi, sem þarf að flýja sín heimkynni og leita skjóls og fóta sig í nýju landi, Íslandi. Þessi vinna nemenda tengist réttindum barna sem og Barnasáttmálanum en þetta málefni snertir margar greinar þess sáttmála. Skólinn varð fyrir skömmu Réttindaskóli Unicef og hefur hafið markvissa innleiðingu Barnasáttmálans. Hér að neðan má sjá nokkrar myndir frá vinnu nemenda sem voru önnum eins og sjá má.

Nemendur í 6.-10. bekk í Síðuskóla taka þátt í sýningunni Sköpun bernskunnar sem opnaði 25. febrúar sl. á Listasafninu á Akureyri. Sýningin höfðar sérstaklega vel til skólabarna, enda sett upp til þess að örva skapandi starf og hugsun barna. Þátttakendur hverju sinni eru börn og starfandi listamenn sem vinna verk sem falla að þema sýningarinnar. Þemað að þessu sinni er manneskjan öll. Sýningin verður opin til 23. apríl.

Hér fyrir neðan sjáið þið mynd af glæsilegu verki nemenda í Síðuskóla sem hlotið hefur mikla athygli. Við hvetjum að sjálfsögðu alla til að fara og kíkja á þessa skemmtilegu sýningu.

Nemendur úr 7. - 10. bekk í Síðuskóla tóku þátt í Stórþingi ungmenna í Hofi í gær, 28. febrúar. Síðuskóli átti sextán fulltrúa á þinginu, fjóra úr hverjum árgangi. Umræðuefnin voru margvísleg s.s. snjómokstur, tómstundir, geðheilbrigðismál, strætó og fleira. Niðurstöður Stórþingsins verða svo ræddar á bæjarstjórnarfundi Unga fólksins þann 14. mars nk. Þar gefst fulltrúum ungmennaráðsins tækifæri til þess að ávarpa bæjarstjórnina og koma á framfæri þeim málum sem börn og ungmenni á Akureyri telja að þarfnist áheyrnar bæjarstjórnar til að bæta stöðu þeirra í sveitarfélaginu okkar.

Síðastliðinn þriðjudag, 28. febrúar var Upphátt, áður Stóra upplestrarkeppnin, haldin á sal skólans. Þar lásu 8 nemendur úr 7. bekk sem höfðu komist áfram eftir bekkjarkeppnina. Allir keppendur stóðu sig mjög vel, en að lokum þurfti að velja tvo nemendur áfram til að keppa fyrir hönd skólans í lokakeppninni sem haldin verður 7. mars næstkomandi í Hofi. Þeir nemendur sem voru valdir eru þær Arna Lind Jóhannsdóttir og Sigurlaug Salka Steinsdóttir. Við óskum þeim innilega til hamingju og hlökkum til að fylgjast með þeim í lokakeppninni í næstu viku. Hér til hliðar má sjá mynd af vinningshöfunum.

Nemendur í vali á miðstigi í Síðuskóla eru þessa dagana að vinna að útgáfu nýs tölublaðs af Síðuskólablaðinu. Það verður birt á heimasíðunni síðar í þessum mánuði. Hér má sjá myndir af áhugasömum blaðamönnum að störfum.

3. mars

Starfamessa í HA, 9. og 10. bekkur

7.mars

Lokahátíð Upphátt, upplestrarkeppni 7. bekkjar

13. mars

Dagur stærðfræðinnar

16. mars

Söngsalur

21. mars

Útivistardagur

24. mars

Skólaheimsókn í Lauga, 9. og 10. bekkur