Fréttabréf Lundarskóla

Ágúst 2023

Kæru foreldrar/forráðamenn nemenda í Lundarskóla

Nú styttist í skólabyrjun. Við hlökkum til að hitta nemendur og takast á við viðfangsefni næsta skólaárs í samvinnu við nemendur og foreldra/forráðamenn skólans. Við höfum metnað til að gera gott skólastarf enn betra. Við vinnum ávallt samkvæmt stefnu skólans um SMT, heilsueflandi grunnskóla, teymisvinnu starfsfólks og í samræmi við menntastefnu Akureyrarbæjar. Í Lundarskóla er starfið í stöðugri þróun með áherslu á aukin gæði náms, vellíðan og velferð nemenda.

Á næsta skólaári verður lögð áhersla á þróun leiðsagnarnáms. Rannsóknir sýna að leiðsagnarnám hefur jákvæð áhrif á námsárangur og sjálfstraust nemenda. Í leiðsagnarnámi er lögð áhersla á sýnileg og skýr markmið, markvisst mat og leiðsögn um næstu skref í námi, samvinnu og félagastuðning og að veita nemendum hlutdeild í ákvarðanatöku um nám sitt.

Einnig verður lögð áhersla á að efla foreldrasamstarf enn frekar. Í því felst að efla skólaráð, auka samstarf við foreldraráð, og styðja bekkjarfulltrúa í að efla foreldrahóp hvers árgangs. Á áætlun er að bjóða foreldrum ýmist á fræðslufundi, kaffihúsafundi, haustkynningar og/eða heimsóknir í árganga í tengslum við kynningar eða þemadaga.

Ef einhverjir foreldrar hafa áhuga á að starfa með okkur í skólaráði og/eða foreldraráði þá væri gott að fá upplýsingar um það. Ef vilji er fyrir hendi þá má senda póst til skólastjóra (Maríönnu) á netfangið marianna@akmennt.is.

Einnig munu umsjónarkennarar óska eftir bekkjarfulltrúum í öllum árgöngum. Mögulega er nú þegar skipulag á því hverjir taka að sér hlutverk bekkjarfulltrúa hverju sinni í árgöngum.

Farsælt samstarf milli heimila og skóla gerir skólastarfið enn betra og við vonumst til að sjá ykkur þegar boð berast um sérstaka viðburði eða heimsóknir í skólann. Við minnum einnig á að foreldrar eru velkomnir í skólann til að taka þátt í skólastarfi í samvinnu við kennara og stjórnendur skólans.

Skólasetning

Skólasetning Lundarskóla verður á sal skólans þriðjudaginn 22. ágúst á eftirfarandi tímum:

2.- 4. bekkur kl. 9:00

5. - 7. bekkur kl. 10:00

8. - 10. bekkur kl. 11:00

Skólastjóri setur skólann og eftir það fara nemendur með umsjónarkennurum í stofu þar sem þeir fá upplýsingar um skólastarfið.

Nemendur í 1. bekk mæta í viðtöl samkvæmt sérstökum pósti frá umsjónarkennurum.

Kennsla hefst samkvæmt stundaskrá þriðjudaginn 23. ágúst hjá öllum árgöngum nema 1. bekk sem byrjar í viðtölum 22. og 23. ágúst. Kennsla hefst hjá þeim miðvikudaginn 24. ágúst.

Frístund verður opin frá og með 22. ágúst skv. skráningu nemenda í Frístund. Nánari upplýsingar um Frístund og starfið þar veitir nýr umsjónarmaður Frístundar sem heitir Íris Björk Árnadóttir.