Fréttabréf Síðuskóla

Það er óhætt að segja að farið sé að síga á seinni hlutann á þessu skólaári. Þegar páskaleyfinu lýkur þá erum við komin fram í apríl.

Eins og fram hefur komið í fréttum þá hefur verið tekin sú ákvörðun að hafa leikskóladeild í Síðuskóla á næsta skólaári. Elsta deild leikskólans Krógabóls mun verða í skólanum og verða stofur C1 og C2 notaðar. Nemendum skólans mun einnig fjölga því gert er ráð fyrir um 50 nemendum í 1. bekk og áætlaður nemendafjöldi því um 380. Í gær mætti Guðrún Schmidt í úttekt á vegum Landverndar því við í skólanum stefnum á að fá Grænfánann afhentan í 9. skipti 25. apríl næskomandi á degi umhverfisins. Sýningin Sköpun bernskunnar er í fullum gangi í Listagilinu og hvetjum við ykkur til að fara að skoða hana. Þar eiga nemendur Síðuskóla glæsilegt verk og einnig er hægt að skoða verk úr öðrum skólum.

Annars höldum við ótrauð áfram, vorið handan við hornið og ekki ástæða til annars en að horfa bjartsýn fram á veginn.

Bestu kveðjur úr skólanum,

Ólöf, Malli og Helga

Við viljum vekja athygli á að búið er að opna fyrir tilnefningar fyrir framúrskarandi skólastarf á vef Akureyrarbæjar. Tekið er við tilnefningum til 9. apríl og mun hátíðin vera haldin í Menningarhúsinu Hofi þann 2. maí kl. 16:30. Við hvetjum ykkur eindregið til að nýta ykkur þetta tækifæri og koma hrósi áleiðis fyrir vel unnin störf í skólum bæjarins. Hægt er að senda inn tilnefningar fyrir nemendur, kennara/starfsfólk og verkefni/skólar.

Slóð á tilnefningarformin er að finna á vef Akureyrarbæjar

Búið er að ákveða að starfrækja elstu deild leikskólans Krógabóls í Síðuskóla á næsta ári. Þetta er gert m.a. til þess að frá með hausti verði rými fyrir öll börn sem sótt hefur verið um pláss fyrir í leikskólum bæjarins. Breytingar verða framkvæmdar á húsnæði skólans, bæði inni og úti. Gert er ráð fyrir að nota stofur C1 og C2. Meðal þess sem gert verður er að girða af svæði á skólalóðinni við innganginn sem leikskóladeildin mun nota. Inni verður skipulagi m.a. breytt með tilliti til starfseminnar. Hér neðar í fréttabréfinu má sjá mynd af leiksvæði fyrir leikskóladeildina sem verður staðsett fyrir utan C inngang skólans.

Í sumar verður skólalóð Síðuskóla endurnýjuð. Hér má sjá drög að skipulagi lóðarinnar, athugið að þetta gæti tekið smávægilegum breytingum. Eins og sjá má á myndunum er um heilmiklar framkvæmdir að ræða og verður þetta mikil breyting til batnaðar fyrir nemendur skólans og allra þeirra sem munu njóta breytinganna.

Það er ánægjulegt að segja frá því að okkur mun fjölga töluvert næsta vetur og eitt af því sem fylgir er að okkur vantar gott fólk í ýmis störf til að mæta þessari stækkun. Fyrir áhugasama má benda á auglýsingarnar sem við sendum frá okkur og má sjá hér.

Þriðjudaginn 21. mars sl. var útvistardagurinn hjá okkur í skólanum og tókst okkur að fara í fyrstu tilraun. Það er töluvert ólíkt því sem gerðist í fyrra þegar veðrið varð til þess að okkur tókst ekki að fara í fjallið fyrr en í fjórðu tilraun. Dagurinn heppnaðist vel og komu nemendur kátir og glaðir heim eftir góðan dag í fjallinu. Hér má sjá nokkrar myndir sem teknar voru.

Fyrir skömmu tók 4. bekkur skólans þátt í árlegri teiknisamkeppni Mjólkursamsölunnar. Alls bárust 1200 myndir í keppnina frá 60 skólum um land allt. Að lokum vor tíu verðlaunamyndir valdar úr þessum mikla fjölda og var ein þeirra frá Síðuskóla. Það voru þær Edda Bjarney Víkingsdóttir, Aþena Vigdís Sigurðardóttir og Ragnheiður Lilja Steinarsdóttir sem teiknuðu myndina. Þær fengu allar viðurkenningarskjal en auk þess fékk myndin peningaverðlaun sem fara í bekkjarsjóð. Við óskum stelpunum innilega til hamingju með árangurinn. Á myndunum sem fylgja má sjá verðlaunamyndina og verðlaunahafana.

Nemendum í 9. og 10. bekk var boðið í heimsókn í Framhaldsskólann á Laugum í síðustu viku. Hér eru nokkrar myndir úr ferðinni.

Þriðjudaginn 7. mars fór fram lokahátíð Upphátt í Hofi. Þar voru mættir 14 keppendur frá grunnskólum Akureyrarbæjar. Okkar fulltrúar voru þær Arna Lind og Sigurlaug Salka. Þær stóðu sig báðar frábærlega en Arna Lind lenti í 2. sæti. Á myndinni má sjá keppendur Síðuskóla eftir keppnina.

Fiðringur á Norðurlandi er hæfileikakeppni ungmenna í grunnskólum Akureyrar og nágrennis og fer nú fram í annað sinn. Í ár taka 12 skólar þátt. Það verða tvær undankeppnir 18. og 19. apríl og svo úrslitakvöld í Hofi 25. apríl. Síðuskóli á Fiðringslið sem keppir í Laugaborg 19. apríl kl. 20.

11. apríl

Kennsla hefst að loknu páskafríi.

11. apríl

9. bekkur - námsráðgjafar VMA koma og kynna skólann.

19. apríl

Undankeppni Fiðrings í Laugaborg

25. apríl

Úrslitakvöld Fiðrings í Hofi

26. apríl

Skólahreysti - Norðurlandsriðill

Skóladagatal næsta skólaárs liggur ljóst fyrir. Gott að vita fyrir þá sem vilja skipuleggja sig lengra fram í tímann.

Hér er hlekkur á skóladagatalið en það er að finna á heimasíðu skólans.