Menntastefnufréttir

Út er komin 3. skýrslan um innleiðingu á menntastefnunni Látum draumana rætast sem tók gildi fyrir röskum tveimur árum.
Í skýrslunni er fjallað um helstu áfangasigra sem náðust á því herrans ári 2020. Þótt vissulega hafi mikið mætt á öllu starfsfólki í skóla- og frístundastarfi borgarinnar á árinu var engu að síður mörgum þróunar- og nýsköpunarverkefnum hrint úr vör sem vert er að vekja athygli á. Verkefnin bera vott um nýsköpun, teymisvinnu og þrautseigju allra þeirra sem staðið hafa í framlínu menntunar í heimsfaraldrinum.

1. skýrslan um innleiðinguna.

2. skýrslan um innleiðinguna

Þróunar- og nýsköpunarsjóður skóla- og frístundaráðs er fjöreggið í fagstarfinu og gerir öllum starfsstöðum kleift að framfylgja sínum áherslum í innleiðingu menntastefnunnar.

Í starfsáætlunum sérhvers starfsstaðar SFS kemur fram með hvaða hætti fagstarfið byggir á menntastefnunni. Stefnan hefur einnig verið lögð til grundvallar í nokkrum stærri verkefnum eins og Draumaskólanum Fellaskóla þar sem unnið er að innleiðingu nýrra starfs- og kennsluhátta með áherslu á leiðsagnarnám, eflingu máls og læsis, tónlist og skapandi skólastarf. Þá leggur Víkurskóli, nýr unglingaskóli í norðanverðum Grafarvogi, ríka áherslu á nýsköpun í anda menntastefnunnar og hún verður einnig höfð að leiðarljósi í uppbyggingu nýrra menntastofnana í Vogabyggð og Skerjafirði.

Rík áhersla er lögð á að fagfólkið á vettvangi útfæri menntastefnuna miðað við aðstæður á hverjum stað.

Reykjavíkurborg veitir nauðsynlegan stuðning í formi almennra aðgerða sem eiga að fylgja eftir helstu stefnumiðum. Þær má skoða í skýrslunni en fela m.a. í sér:

• Þróunar- og nýsköpunarsjóðinn "Látum draumana rætast" 200 m.kr.
• Nýsköpunarmiðju Menntamála
• Gróskan - Stafræn vegferð Reykjavíkurborgar aukning um 733 m.kr. á þremur árum
• Aukna áherslu á alþjóðasamstarf og styrkjasókn
• Miðju máls og læsis - sérstök áhersla á stuðning við fjöltyngd börn 143 m.kr.
• Betri borg fyrir börn, farteymi og fjölgun talmeinafræðinga
• Aukna starfsþróun og samstarf við Menntavísindasvið
  
• Vef menntastefnunnar
• Innleiðingu Barnasáttmálans

Nokkrar lykiltölur um ávinning af almennum aðgerðum

• +6.500 þátttakendur í starfsþróun
• 130 börn á sumarnámskeiði í íslensku
• 25 börn í Birtu-stoðdeild fyrir börn sem eru umsækjendur um alþjóðlega vernd
• 31.072 heimsóknir inn á vefinn menntastefna.is á árinu 2020
• 450 verkfæri sett inn í verkfærakistu menntastefnunnar
• 360 ný myndbönd búin til og sett á Vimeo
• 46.000 áhorf á Vimeo myndbönd
• 170 verkefni í A-hluta þróunarsjóðs fengu styrk
• 25 umsóknir og 10 styrkt verkefni úr B-hluta þróunarsjóðsins
  
• 8 styrktarverkefni í B-hluta unnin í samvinnu við fræðasamfélagið
• 125,5 m.kr í styrki fyrir 33 alþjóðleg samstarfsverkefni
• 118 námsleyfi til leikskólastarfsfólks
• 34 námsleyfi til starfsfólks í frístundastarfi
• 32% fjölgun í grunnnám á MVS HÍ - alls 980 umsóknir á árinu 2020

Stofnaður hefur verið framtíðarhópur sem hefur fengið það hlutverk að leggja mat á hvernig til hefur tekist að innleiða menntastefnuna síðastliðin ár og leggja fram aðgerðaráætlun til næstu þriggja ára.

Rafrænt Menntastefnumót verður haldið 10. maí fyrir allt starfsfólk í skóla- og frístundastarfinu. Það verður uppskeruhátíð fyrir það víðtæka þróunar- og nýsköpunarstarf sem unnið hefur verið síðastliðin tvö ár. Auk þess verður boðið upp á fræðslu og fyrirlestra sem tengjast áherslum stefnunnar. Starfsstaðir eru hvattir til að senda inn tillögur að kynningum.

Meðal fyrirlesara á Menntastefnumótinu verður finnski menntunarfræðingurinn Pasi Sahlberg sem lagði töluvert á vogarskálarnar þegar verið var að móta menntastefnuna.

Á stefnumótinu verða einnig afhent hvatningarverðlaun skóla- og frístundaráðs fyrir framsækið fagstarf í leikskólum, grunnskólum og frístundamiðstöðvum borgarinnar.

Allir geta tilnefnt til verðlaunanna - sjá frétt og tilnefningarblað.

Stöðugt vex framlag starfsfólks í verkfærakistu menntastefnunnar en þar má deila hugmyndum og verkefnum sem hafa reynst vel í fagstarfinu. Um 450 verkfæri eru komin í kistuna sem styðjast má við til að framfylgja meginþáttum stefnunnar; félagsfærni, sjálfseflingu, læsi, sköpun og heilbrigði. Dæmi um verkfæri sem borist hafa í kistuna frá starfsfólki á liðnum mánuðum:

• Verkferlar um móttöku barna af erlendum uppruna.
• Ný birtingarmynd kynferðisbrota
• Vinafundir og hreyfistundir í leikskólanum Rauðhól
• Frístundalæsi – skemmtileg foreldrahandbók
• Líðan á tímum Covid
• Kvikindahátíð
• Geðfræðsla í grunnskólum - tillögur að kennslu- og fræðsluefni

Starfssemi á vegum Mixtúru í Safamýri 5 er liður í því að bæta stuðning við fagstarfið í skólum og frístundamiðstöðvum. Þar er m.a. aðstaða fyrir skapandi tækni í snillismiðjum, Búnaðarbanki og fjölnota salur. Á síðustu misserum hefur Mixtúra einnig haft umsjón með upptökum og gerð fjölmargra myndbanda. Þá býður aðstaðan upp á að flytja fræðslu, ráðstefnur og viðburði yfir á net. Dæmi um það eru:

• Sumarsmiðjur grunnskólakennara
• Höfuð í bleyti
• En ég var einn! Sjálfsmynd stráka og kerfið
• RannUng - Sterkari út úr kófinu - Morgunverðarfundur á degi leikskólans

Vefurinn Nám í Reykjavíkurborg stutt af neti fór í loftið á vormánuðum. Á honum eru kennslumyndbönd, leiðbeiningar, handbækur og margt fleira.

Fjölbreytt starfsþróun í tengslum við tæknilausnir og nám á neti er í boði á vegum Mixtúru vorið 2021, sjá starfsþróunarsíðu menntastefnuvefsins.

Senn eru tvö ár síðan skóla- og frístundasvið Reykjavíkurborgar og Menntavísindasvið HÍ gerðu með sér samning um gagnvirkt samstarf. Annars vegar er lögð áhersla á aukna fræðslu og ráðgjöf frá kennurum og sérfræðingum á Menntavísindasviði til starfsfólks SFS og hins vegar að gera fagstarf í skólum og frístundastarfi borgarinnar sýnilegra í öllu fræðastarfiinu, s.s. í kennslu og rannsóknum. Það hefur sýnt sig að þetta samstarf, sem byggir á menntastefnunni, hefur styrkt mjög tengsl við háskólasamfélagið og lyft undir starfsþróun á sviðinu.

Samstarfssamningurinn miðar ekki síst að því að fjölga fagmenntuðu starfsfólki í skóla- og frístundastarfi borgarinnar með áherslu á öflugt kynningarstarf. Eins og kom fram hér að ofan hefur það samstarf skilað sér í mikilli fjölgun í allt grunnnám hjá Menntavísindasviði.

Einnig hefur verið leitast við að byggja upp markvissa símenntun með námskeiðahaldi, leiðsögn, ráðgjöf og rannsóknum, svo og að bjóða starfsfólki, sem lokið hefur stúdentsprófi og/eða grunn- eða framhaldsnámi í háskóla, upp á einingabært nám.

Sjá skýrslu um samstarf MVS og SFS

Tækifærum til starfsþróunar hefur fjölgað jafnt og þétt. Lögð hefur verið áhersla á að bjóða upp á lengra og einingabært nám á Menntavísindasviði en mikilvægt er að hafa í huga að fara má margar leiðir að sama marki.

Margvísleg styttri námskeið eru í boði og einnig er hægt að skrá sig í lærdómssamfélög og tengiliðahópa, á sérsniðin og sértæk námskeið, s.s. á vegum Mixtúru og Miðju máls og læsis.
Kynntu þér möguleika þína á starfsþróun og mundu að svo lengi lærir sem lifir.

Í tengslum við innleiðingu menntastefnunnar hefur verið útbúið kynningarefni; bæklingar, veggspjöld og póstkort á íslensku, ensku og pólsku að ógleymdum vef menntastefnunnar.

Kynningar- og myndefni er aðgengilegt á vefnum, m.a. smámyndir sem hægt er að hafa með undirskrift í tölvupósti og myndskreyta með skýrslur, glærur og annað efni.

Starfsfólk er hvatt til að nýta þetta myndefni og taka þátt í að kynna helstu áherslur menntastefnunnar.

Starfsfólk SFS getur nýtt sér gátlista til að meta að með hvaða hætti unnið er að fimm grundvallarþáttum menntastefnunnar. Hægt er að nálgast gátlistana á rafrænu formi með því að setja inn notandanafn og lykilorð sem starfsstaðir hafa fengið úthlutað.

Fimm myndbönd hafa verið gerð um hvernig nýta má gátlistana.

Á menntastefnuvefnum er hægt að kynna sér þau nýsköpunar- og þróunarverkefni sem fengið hafa styrki og skilað afrakstri sem samnýta má í námi og leik um alla borg. Meðal þeirra er verkefnið Siðfræðikennsla í frístundastarfi sem unnið var í samstarfi frístundaheimilisins Undralands, Tjarnarinnar og Háskóla Íslands.

Skapandi námssamfélag í Breiðholti er annað verkefni með margvíslegu kennsluefni, s.s. vínyl-uppskriftarbók og bæklingnum Hvað er mýsli? og Sýslað með mýsli.

Samstarfsverkefnið Austur-Vestur sem unnið er af kennurum í Ingunnarskóla, Vesturbæjarskóla, Selásskóla og Háskóla Íslands hefur líka skilað sér í kennsluefni og leiðbeiningum um sköpunarsmiðjur sem hægt er að kynna sér á vef verkefnisins.

Samstarfsverkefni fjögurra leikskóla; Engjaborgar, Funaborgar, Hólaborgar og Sunnufoldar, um innleiðingu menntastefnunnar hefur skilað sér í myndböndum um sjálfseflingu barna og starfsfólks. Þau henta einnig foreldrum. Í myndböndunum er farið yfir nokkur grundvallaratriði í samskiptum við yngri börn, vera virkur í leik, fara niður í hæð barna, að heilsa og kveðja og brosa.

Myndböndin eru á íslensku, ensku og pólsku og aðgengileg í verkfærakistu menntastefnunnar.

Loksins er komið að því! Hæfileikakeppnin Skrekkur 2020, sem fresta þurfti þrisvar sinnum á liðnu ári vegna samkomutakmarkana, hrekkur nú í gang. Átján skólar taka þátt að þessu sinni og keppa til úrslita í Borgarleikhúsinu 1. 2. og 3. mars. Keppnin verður án áhorfenda, en fer fram kl. 20.00 í beinu streymi á www.ungruv.is. Úrslitakvöldið verður svo í beinni sjónvarpssendingu á RÚV á sama tíma þann 15. mars.

Félagsmiðstöðvarnar eru nú að undirbúa Skrekks-partý þar sem unglingarnir geta notið sviðslista skólafélaga sinna öll kvöldin í stigvaxandi spennu. #skrekkur

Fimmtán skólar taka þátt í þróunarverkefninu Listrænt ákall til náttúrunnar (LÁN) sem ætlað er skapa samtal á milli náttúrufræði og listgreina. Lögð er áhersla á að fræðast um náttúruna á skapandi hátt með aðferðum list- og verkgreina.

Markmið LÁN samstarfsverkefnisins er m.a. að:

• List- og verkgreinakennarar öðlist nýja sýn á málefni náttúrufræði á sama tíma og náttúrufræðikennarar kynnist vinnuaðferðum lista og hönnunar.

• Kennarar byggi á fyrri reynslu og leiti leiða við að auka áhuga ungs fólks á náttúrufræðum og málefnum sjálfbærni.

• Mæta kröfum menntastefnu Reykjavíkur um fjölbreytta kennsluhætti.

• Stuðla að samtali milli kennara sem vilja innleiða sjálfbærni og þverfaglegra kennsluhætti.

• Styrkja tengslanet milli skóla.

Verkefnið er viðbragð við heimsmarkmiðum Sameinuðu þjóðanna vegna hamfarahlýnunar og leið fyrir skólasamfélagið til að nálgast vandann á nýjan hátt.

Skólarnir sem taka þátt í LÁN eru Fellaskóli, Foldaskóli, Hagaskóli, Háaleitisskóli, Húsaskóli, Klettaskóli, Landakotsskóli, Laugalækjaskóli, Laugarnesskóli, Melaskóli, Seljaskóli, Sæborg, Vesturbæjarskóli, Vogaskóli og Ægisborg

Áhugasamir geta tengst Facebook-síðunni: Hvað getum við gert - Listrænt ákall til náttúrunnar

VikaSex hefur fest sig í sessi enda byggir kynfræðsla í 6. viku ársins alfarið á hugmyndum unglingannna sjálfra um fræðslu og umræður. Í fyrra var þema vikunnar samskipti og tilfinningar og á þessu ári kynlíf. Unglingar í skólum og félagsmiðstöðvum borgarinnar tóku virkan þátt í umræðum og ræddu m.a. muninn á klámi og kynlífi, fóru á trúnó, saumuðu út kynfæri og bökuðu frumlegar kynfærakökur.

Kynheilbrigði fellur undir alla lykilþætti menntastefnunnar og útfærir sérhver starfsstaður verkefnið á þann hátt sem best hentar hverju sinni. Fjölbreytt fræðsluefni um kynheilbrigði er að finna undir VIkuSex á vef menntastefnunnar.

Níu stuttmyndir urðu til á námskeiðinu Stelpur filma! sem haldið var í Norræna húsinu á haustdögum og lauk með uppskeruhátíð í Bíó Paradís. Sjötíu stelpur úr 8. og 9. bekk í níu grunnskólum tóku þátt í námskeiðinu ásamt kennurum, einum úr hverjum skóla.

Mikill metnaður er lagður í þetta verkefni sem haldið hefur verið þrisvar sinnum og hefur að markmiði að rétta við kynjahallann í íslenskri kvikmyndagerð. Það er unnið í samstarfi Mixtúru og Alþjóðlegu kvikmyndahátíðarinnar RIFF og styrkt af Barnamenningarsjóði.

Árið 2018 hófst formleg innleiðing Barnasáttmála Sameinuðu þjóðanna í starfsemi skóla- og frístundasviðs. Verkefnastjóri hefur sinnt fræðslu og ráðgjöf til leikskóla, grunnskóla og í frístundastarfi og kynnt hvernig hægt er að nýta sáttmálann í fagstarfinu.

Á námskeiðum og fræðslufundum er farið yfir hugmyndafræði og helstu greinar sáttmálans og þær tengdar markvisst við menntastefnu borgarinnar. Háteigsskóli, frístundaheimilið Halastjarnan og félagsmiðstöðin 105 hófu innleiðingarferli á liðnu ári, einnig Borgarskóli og frístundaheimilið Hvergiland, Engjaskóli, frístundaheimilið Brosbær og félagsmiðstöðin Vígyn í Grafarvogi. Þá hefur Víkurskóli fengið kynningu og stefnir að innleiðingu Barnasáttmálans á þessu ári.

Meira um Barnasáttmálann.

Sérkennslustjórar í öllum leikskólum borgarinnar eru að byggja upp lærdómssamfélag með stuðningi Fjólu Þorvaldsdóttur, verkefnastjóra sérkennslu, og Þóru Sæunnar Úlfsdóttur, verkefnastjóra hjá Miðju máls og læsis.
Yfirlit yfir starfsemi hópsins er á vef menntastefnunnar auk þess sem gefin hefur verið út handbók sérkennslustjóra með öllum helstu upplýsingum.