Flataskólafréttir

Það er heldur undarlegt ástand hjá okkur í skólanum þessa dagana enda hefur töluverðum hluta skólahúsnæðisins verið lokað vegna myglu eins og kunnugt er. Um er að ræða 8 kennslustofur, leikskóladeildina, frístundina og matsalinn okkar. Nágrannar okkar í Garðaskóla brugðust hratt við og náðu að nýta allar smugur í sinni stundaskrá og húsnæði til að þjappa sínum hóp og þannig gátum við fengið aftur til afnota þær stofur í norðurálmu skólans sem Garðaskóli hafði nýtt síðustu mánuðina. Þannig slapp fyrir horn að við náum enn að halda nemendahópnum okkar í sama húsi, nema leikskóladeildinni sem fluttist tímabundið í húsnæði leikskólans Urriðabóls. Jafnframt hefur verið gripið til mótvægisaðgerða eins og sótthreinsunar og nýtingu lofthreinsitækja til að verjast áhrifum þess ef enn kunna að vera gró á ferð um skólann.

Á næstu dögum eigum við síðan von á frekari niðurstöðum úr sýnatökum sem fram fóru snemma á árinu, þá kemur í ljós hvort grípa þarf til frekari ráðstafana og munum við greina frá þeim niðurstöðum með póstum og með upplýsingafundi þegar þar að kemur.

Byrjað er að leggja drög að þeim lagfæringum sem þarf að gera á húsnæðinu en erfitt er að gera heildaráætlun um þær framkvæmdir fyrr en öll gögn liggja fyrir.

Eins og gefur að skilja hefur það margvísleg áhrif á skólastarfið þegar þrengir að á þennan hátt. Þannig hefur staðan bein áhrif á alla nemendur og starfsmenn skólans. Margir hafa þurft að flytja sig um set, sumir hafa þurft að þjappa sér á minni svæði, sumir þurfa að fara lengra til að komast á salerni, mataraðstaðan er breytt, nestisaðstæður eru verri tímabundið, frístundin þarf að nýta kennslustofur og það hefur töluvert takmarkandi áhrif að vera án matar- og samkomusalar.

Allir eru þó staðráðnir í að láta hlutina ganga upp og þannig náum við að halda úti prýðilegu skólastarfi dag hvern. Við viljum þakka starfsfólki, nemendum og foreldrum fyrir skilning og þrautseigju í þessum aðstæðum. Jafnframt færum við Garðaskóla kærar þakkir fyrir snögg viðbrögð þegar að þrengdi.

Kærar kveðjur úr skólanum,

skólastjórnendur

• 13.-17. febrúar - Vetrarfrí í grunnskólum Garðabæjar
• 22. febrúar - Öskudagur - skóladagur grunnskóla til kl. 12:00
• 13. mars - Skíðaferð 1./3./7.b
• 14. mars - Skíðaferð 2./4./5.b
• 14.-15. mars - Skíðaferð / gisting hjá 6.b
• 28. mars - Stóra upplestrarkeppni 7. bekkjar
• 30. mars - Árshátíð 7. bekkjar
• 1.-10. apríl - Páskaleyfi grunnskóla

Nú er fyrirlögn lesfimiprófa janúarmánaðar lokið og niðurstöður ljósar. Þær eru í heildina tekið jákvæðar og allir árgangar skólans mælast nú yfir landsmeðaltalinu. Á myndinni hér fyrir neðan má sjá meðalleshraða nemenda í árgöngum skólans borið saman við landsmeðaltal. Bláa línan er Flataskóli en rauða línan er landsmeðaltalið.

Nú setjum við upp matsali á göngum skólans í vesturálmu í hádeginu og afgreiðum hádegismat til nemenda þar. Enn sem komið höfum við þó ekki náð að koma upp aðstöðu til að hita nesti og þeir nemendur sem ekki eru í mataráskrift þurfa enn um sinn að taka mið af því. Vonandi tekst okkur að laga þetta í næstu viku en eftir er að hreinsa búnaðinn sem til þarf og finna honum nýjan og öruggan stað.

Í febrúarmánuði fær hluti foreldra skólans senda spurningakönnun frá Skólapúlsinum. Um er að ræða úrtak sem Skólapúlsinn tekur úr aðstandendalista skólans en könnun þessi er lögð fyrir annað hvert ár. Niðurstöðurnar eru hluti af innra mati skólans og eru nýttar til að finna vísbendingar um styrkleika og veikleika í skólastarfinu og þar með hvernig bæta megi starfið jafnt og þétt. Það er því afar mikilvægt að þeir sem fá könnunina senda gefi sér tíma til að svara henni. Nánari upplýsingar má nálgast hér: https://skolapulsinn.is/um/?page_id=1126

Við viljum vekja athygli á hlaðvarpi Meðvitaðra foreldra - virðing í uppeldi. Þarna er um að ræða hlaðvarp sem hefur að geyma margs konar fræðslu, umræður og umfjöllun um fjölmarga þætti sem snerta uppeldismál og er vel þess virði að kynna sér. Slóðin á hlaðvarpið er: https://podtail.com/podcast/vir-ing-i-uppeldi/

Nú er kominn sá árstími að allra veðra er von og því rétt að vekja athygli foreldra á upplýsingum sem varð viðbrögð við óveðri. Skólastarf fellur ekki niður nema tilkynnt sé um það sérstaklega. Í upphafi skóladags getur í verstu veðrum tafist að fullmanna skóla og mega forsjáraðilar þá búast við því að starfsfólk leiti liðsinnis þeirra.

Forsjáraðilar leggja ávallt sjálfir mat á það hvort fylgja þurfi barni í eða úr skóla vegna veðurs, óháð því hvort tilkynning hafi borist frá yfirvöldum. Meti forsjáraðilar aðstæður svo að ekki sé óhætt fyrir börn þeirra að sækja skóla skulu þeir tilkynna skólanum um það sem lítur þá á tilvikið sem eðlilega fjarvist. Sama gildir ef börn eða forsjáraðilar lenda í vandræðum á leið sinni til skóla og verða frá að hverfa. Nánari upplýsingar um viðbrögð við óveðri má finna hér.

Núna í skammdeginu geta endurskinsmerki skipt sköpum en því miður eru ekki allir nemendur okkar nægilega vel glitrandi í myrkrinu. Við minnum því á mikilvægi endurskinsmerkjanna og biðjum foreldra um að yfirfara útifatnað og töskur barnanna þannig að þau séu eins örugg í umferðinni og unnt er.

Allir forráðamenn ættu að hafa aðgang að mentor en þar er að finna ýmsar upplýsingar varðandi ástundun og nám nemenda. Rétt er að benda á að nálgast má handbók fyrir aðstandendur í mentorkerfinu á heimasíðu mentor.is undir "aðstoð" eða með því að smella hér..

Skrifstofa skólans er opin kl. 7:45-16:00 alla daga vikunnar nema á föstudögum til kl. 14:30

Hægt er að senda skólanum tölvupóst á netfangið flataskoli@flataskoli.is

Mælst er til að foreldrar/aðstandendur skrái veikindi nemenda á Fjölskylduvef Mentor.is eða með Mentor appinu.
Auk þess er hægt að tilkynna forföll á skrifstofu skólans með tölvupósti eða í síma 513 3500. Vakin er athygli á að ef veikindi vara lengur en einn dag skal tilkynna daglega.

Um leyfisbeiðnir o.fl. - sjá hér.

Menntun - Árangur - Ánægja

Email: flataskoli@flataskoli.is
Website: flataskoli.is
Location: Flataskóli, Gardabaer, Iceland
Phone: 513 3500