Árshátíðartengja

Kæru nemendur/foreldrar/forráðamenn!

Nú styttist óðum í árshátíð nemenda en hún verður dagana 20. og 21. janúar.

Æfingar standa nú sem hæst og nemendur eru að vanda jákvæðir og standa sig vel. Íþróttakennsla fer að hluta til fram utandyra og í kennslustofum nemenda árshátíðarvikuna.

Föstudaginn 20. janúar verða nemendasýningar en sýningar fyrir foreldra og aðra aðstandendur verða á laugardeginum.

Fram til þessa hafa aðeins verið tvær sýningar fyrir fjölskyldur og gesti á laugardeginum, eins og þeir vita sem hafa sótt þessar sýningar hefur verið mjög þröngt í salnum og fólk jafnvel ekki fengið sæti. Því höfum við ákveðið að prófa að hafa þrjár sýningar og meta í framhaldinu kostina og gallana við það.

Árshátíðarsýningar laugardaginn 21. janúar verða þrjár að þessu sinni:

Kl. 11:00 sýna 1.—4. bekkur og 10. bekkur.

Kl. 13:00 sýna 5.—7. bekkur og 10. bekkur.

Kl. 15:00 sýna 8.—10. bekkur.

Salurinn opnar hálftíma fyrir sýningar. Ekki er hægt að taka frá sæti.

Miðasala og verð: Forsala á sýningarnar verður hjá Kristínu ritara á miðvikudag, fimmtudag og föstudag fyrir árshátíð. Í forsölu kostar hver miði 500 krónur en á sýningardag (laugardag) kosta allir miðar 600 krónur. Krakkar á grunnskólaaldri greiða inn á sýninguna en frítt er fyrir börn undir 6 ára. Fólk sem á börn á fleiri en einni sýningu getur látið vita í miðasölu og fær þá miða fyrir seinni sýninguna án endurgjalds.

Nemendur mæta allir í heimastofur sínar á venjulegum tíma, þ.e. kl. 8:10. Þá hefst undirbúningur sýninga og kl. 9:00 mæta allir nemendur á sal. Við tökum okkur hlé um kl. 10 og þá fara allir nemendur í stofur, borða nesti og teygja úr sér. Þennan dag má koma með safa og sætabrauð til hátíðarbrigða (ath. ekki gos eða sælgæti).

Eftir nesti fara allir nemendur aftur á sal. Eftir frágang og lokaundirbúning fyrir laugardagssýningarnar er hádegismatur.

Skóladegi lýkur á sama tíma og venja er skv. stundatöflu á föstudögum.

Á laugardegi eru sýningar fyrir fjölskyldur nemenda og aðra gesti. Til að sem flestir geti fengið sæti hafa nemendur ekki verið á sýningum á laugardegi, heldur hafa verið með kennurum sínum í stofum meðan á sýningu stendur. Við biðjum foreldra um að virða þessa reglu. Við biðjum fólk um að sýna tillitssemi og yfirgefa ekki salinn fyrr en allir bekkir hafa sýnt sitt atriði. Til að hljóð skili sér og nemendur fái að njóta sín á sviði verður að vera gott næði í salnum. Foreldrar yngstu barnanna sækja börnin sín í stofurnar að sýningum loknum, svo að allir komist í kaffi eða geti fylgst að heim á leið. Börnin eru á ábyrgð foreldra í kaffihléum og eftir sýningar.