Nesskólafréttir

Fjórði maí er handan við hornið

Kæru forráðamenn

Þá sér loks fyrir endann á áhrfifum samkomubanns á skólann okkar. Öllum takmörkunum hvað nemendur varðar verður aflétt frá og með mánudeginum 4. maí.

"Ákvæði 3., 4. og 5. gr. auglýsingar þessarar taka ekki til nemenda í starfsemi leik- og grunnskóla þannig að þar sé hægt að halda óskertri vistun og kennslu. Sama á við um starfsemi dagforeldra, frístundaheimila, félagsmiðstöðva og aðra lögbundna þjónustu á leik- og grunnskólastigi. Í því felst að ekki eru takmarkanir á því hversu margir nemendur geti verið saman komnir eða nálægð þeirra í framangreindri starfsemi, þ.m.t. í frímínútum og mötuneyti. Öðrum en nemendum ber í framangreindri starfsemi að fara eftir ákvæðum auglýsingarinnar eins og unnt er."

Þrátt fyrir að öllum hömlum hafi verið aflétt hvað nemendur varðar þá getur verið að stundatöflur sem ná fram yfir 13:00 taki einhverjum breytingum, m.a vegna þrifa.

zoom_out_map

1. og 2. bekkur

Það er óhætt að segja að yngstu nemendurnir okkar hafa verið undir hvað mestu álaginu. Nemendahópum var breytt, frímínútur og matarhlé stytt, sama rýmið var notað fyrir kennslu og Vinasel. Það hefur verið aðdáunarvert að fylgjast með hversu vel krakkarnir aðlöguðust þessum breytingum.

Frá og með mánudeginum 4. maí hverfum við aftur til sama skipulags og var fyrir samkomubann. Klara, Brynja, Berglind og Stebba bíða spenntar eftir nemendum sínum og framundan er fjörugur og skemmtilegur maímánuður með blíðuveðri...er það ekki :)

zoom_out_map

1. bekkur sund

Það er ánægjulegt að geta sagt frá því að fyrsti bekkur fær sundkennslu þetta vorið. Salóme Rut Harðardóttir brást vel við ósk okkar og mun, líkt og í fyrra, kenna fyrstu bekkingum okkar fyrstu sundtökin. Foreldrar fá nánari upplýsingar síðar í vikunni en við vonumst til að geta byrjað þriðjudaginn 5. maí.

Vinasel

Starfsemi Vinasels verður með sama hætti og fyrir samkomubann. Krakkarnir komast þá loksins aftur á sinn gamla stað, fá meira pláss og leikföngin sín aftur.

Miklar breytingar voru á vistun margra meðan á samkomubanni stóð. Mikilvægt er að koma upplýsingum sem fyrst til skristofu skólans eða Jennýjar forstöðukonu um hvernig vistun verður háttað í maí.

zoom_out_map

3. bekkur

Að mörgu leyti má segja að minnstu breytingarnar verði hjá þriðja bekk, þau héldu sinni stofu og starfsfólki að mestu. Nú krossleggjum við bara fingur og vonumst eftir veðurfarslega góðum maí því þá verður sko enn meira gaman hjá okkur... :)

zoom_out_map

4. bekkur

Áfram heldur fjörið hjá fjórða bekk. Við vorum svo heppin að fá Óskar Ágúst til að leysa Þórfríði af um það leyti sem samkomubannið brast á. Eftir páska hefur þríeykið: Höskuldur, Jenný og Óskar notið aðstoðar Rögnu Daggar. Hóparnir munu vinna náið saman það sem eftir er skólaársins.

zoom_out_map

5. bekkur

Fimmtu bekkjar hóparnir fara nú aftur í sitt gamla horf, en hópunum var breytt á sínum tíma. Þá mun 5. JT fara aftur í sína gömlu stofu...406.

zoom_out_map

6. bekkur

Sjötti bekkkur hefur verið tvískiptur í tveimur samliggjandi stofum á unglingastigs ganginum en mun nú fara aftur á fornar slóðir... í stofu 301.

zoom_out_map

Bekkjarmyndatökur

Fimmtudaginn 7. maí munu fara fram bekkjarmyndatökur hjá 1., 4., 7. og 10. bekk. Búið er að senda kynnis- og leyfisbréf vegna myndatökunnar til foreldra. Mjög mikilvægt er að leyfisbréfið skili sér aftur í skólann sem fyrst og helst ekki síðar en miðvikudaginn 6. maí.

zoom_out_map

Fjarkennsluhópar

Eftir langa útlegð opnast skólinn aftur fyrir nemendum 7. - 10. bekkjar. Stundarskráin eins og hún var gæti tekið örlitlum breytingum sem skýrast betur þegar nemendurnir koma aftur í skólann. En sem dæmi má nefna þá mun vettvangsnám tíunda bekkjar ekki halda áfram og miðvikudagstaflan því breytast.