Við vekjum sérstaka athygli á að öll notkun farsíma er óheimil á skólatíma í yngri bekkjum Varmahlíðarskóla, það er í 1.-7. bekk.
Á unglingastigi, í 8.-10. bekk, hefur ákvörðun verið tekin um takmarkaða notkun eða snjalltækjalausan september fyrir hádegi. Það á bæði við um síma og önnur snjalltæki.
Í almennum skólareglum Varmahlíðarskóla segir: “Við notum snjalltæki (síma/spjaldtölvur) í samráði við kennara og starfsfólk.” Hvort tækjalaus september verður framlengdur eða gerðar frekari breytingar á unglingastigi verður endurskoðað í september í samvinnu við nemendaráð og aðra hagsmunaaðila.
Með öðrum orðum þá viljum við tryggja að vinnutími nemenda og starfsfólks sé virtur og leggja upp með að nemendur læri sjálf að virða sinn vinnutíma. Frímínútur og frjálsar stundir á síðan að nýta sem mest og best til félagslegra samskipta og leikja af ýmsu tagi.
Við biðlum til ykkar foreldra og forsjáraðila að standa með okkur í þessum ákvörðunum og hringja ekki til barna eða senda þeim boð á meðan á skólatíma stendur. Sé nauðsynlegt að koma boðum má hringja á skrifstofu skólans í síma 455 6020.
Við viljum sérstaklega árétta að nemendum í 1.-7. bekk er ekki heimil nein notkun farsíma á skólatíma, hvorki í kennslustundum, frímínútum eða á öðrum tímum. Séu aðstæður þannig að nauðsynlegt þyki að barn hafi meðferðis síma vegna annarra verkefna að loknum skóladegi að þá ætlumst við til þess að síminn sé geymdur í töskunni og slökkt á símanum á skólatíma. Æskilegast er að símar séu geymdir heima eins og því er við komið.
