Árshátíðartengja

Kæru nemendur/foreldrar/forráðamenn!

Nú styttist óðum í árshátíð nemenda en hún verður dagana 25. og 26. janúar.

Æfingar standa nú sem hæst og nemendur eru að vanda jákvæðir og standa sig vel.

Íþróttakennsla fer að hluta til fram utandyra og í kennslustofum nemenda árshátíðarvikuna.

Föstudaginn 25. janúar verða nemendasýningar, en sýningar fyrir foreldra og aðra aðstandendur verða á laugardeginum.

Í fyrra vorum við með þrjár sýningar á laugardeginum og þótti takast vel til. Rýmra var um áhorfendur í sal og á kaffihlaðborði. Þessu verður haldið áfram með sama hætti, en röðun verður önnur en í fyrra þar sem við ætlum nú að aldursblanda á sýningarnar.

Árshátíðarsýningar laugardaginn 26. janúar verða þrjár að þessu sinni:

Kl. 11:00 sýna 1., 5., 7. og 10. bekkur.

Kl. 13:00 sýna 2., 4.,8. og 10. bekkur.

Kl. 15:00 sýna 3., 6., 9. og 10. bekkur.

Salurinn opnar hálftíma fyrir sýningar. Ekki er hægt að taka frá sæti.

Miðasala og verð: Forsala á sýningarnar verður hjá Kristínu ritara á miðvikudag, fimmtudag og föstudag fyrir árshátíð. Í forsölu kostar hver miði 500 krónur en á sýningardag (laugardag) kosta allir miðar 600 krónur. Krakkar á grunnskólaaldri greiða inn á sýninguna en frítt er fyrir börn undir 6 ára. Fólk sem á börn á fleiri en einni sýningu getur látið vita í miðasölu og fær þá miða fyrir seinni sýninguna án endurgjalds.

Flestir nemendur sýna á síðustu sýningunni og því mælum við með því að þeir foreldrar barna í 10. bekk sem hafa val um fleiri en eina sýningu komi frekar á aðra hvora fyrri sýninguna.

Nemendur mæta allir í heimastofur sínar á venjulegum tíma, þ.e. kl. 8:10. Þá hefst undirbúningur sýninga og kl. 9:00 mæta allir nemendur á sal. Við tökum okkur hlé um kl. 10 og þá fara allir nemendur í stofur, borða nesti og teygja úr sér. Þennan dag má koma með safa og sætabrauð til hátíðarbrigða (ath. ekki gos eða sælgæti).

Eftir nesti fara allir nemendur aftur á sal. Eftir frágang og lokaundirbúning fyrir laugardagssýningarnar er hádegismatur.

Skóladegi lýkur á sama tíma og venja er skv. stundatöflu á föstudögum.

Á laugardegi eru sýningar fyrir fjölskyldur nemenda og aðra gesti. Til að sem flestir geti fengið sæti hafa nemendur ekki verið á sýningum á laugardegi, heldur hafa verið með kennurum sínum í stofum meðan á sýningu stendur. Við biðjum foreldra um að virða þessa reglu. Við biðjum fólk um að sýna tillitssemi og yfirgefa ekki salinn fyrr en allir bekkir hafa sýnt sitt atriði. Til að hljóð skili sér og nemendur fái að njóta sín á sviði verður að vera gott næði í salnum. Foreldrar yngstu barnanna sækja börnin sín í stofurnar að sýningum loknum, svo að allir komist í kaffi eða geti fylgst að heim á leið. Börnin eru á ábyrgð foreldra í kaffihléum og eftir sýningar.