Heimaskólar

Heimaskólarnir verða enn opnir næstu vikurnar eða til 4. maí. Þá vonum við að skólahald verði aftur eðlilegt og heimaskólarnir geti lokað. Í Hörðuvallaskóla er búið að setja flest alla nemendur í 6. til 10. bekk í fjarkennslu en yngri nemendur fá að mæta í skólann og eru næstum heilan skóladag. Þetta fréttabréf er því að mestu tileinkað eldri nemendum.

Kópavogsbær er með netskákmót fyrir alla krakka á grunnskólaaldri. Allar upplýsingar um það eru hér.

Allir foreldrar eru hvattir til að skrá sín börn.

Útilistaverk eru alltaf skemmtileg, sérstaklega ef að þau eru falleg og geta staðist smá áveður. Að láta eitthvað standast smá átak er líka eðlisfræði eins og sjá má á þessari síðu.

Náttúrleg efni eins og könglar, trjágreinar og jafnvel rusl (sem er náttúrulega ekki náttúrulegt) henta líka í skartgripagerð.

Önnur leið til að læra eðlisfræði er að nota spagettí, búa til brú sem heldur sífellt þyngri hlutum, byggja turn sem nær alla leið upp í loft eða mjög háan sem hægt er að færa úr stað. Það má líka nota spagettí til að útbúa rúmfræðilega hluti eins og þríhyrninga, ferninga, sívalninga... en líklega ekki hringi. Það er hægt að nota sykurpúða, límband eða band til að setja saman hluti eða jafnvel prófa allt í sitthvoru verkefninu til að finna út hvað virkar best.

Hér eru upplýsingar um spaghetti - sykurpúða áskorun.

Hér eru myndir af fullt af spaghettí áskorunum.

Það er tilvalið að nýta tímann núna þegar vorið er að byrja til að gera fínt í kringum okkur. Ein leið er að fara í "plokktúr", þ.e. fara út með ruslapoka og fylla hann að rusli sem þið annað hvort flokkið eða hendið í ruslið.

Önnur leið er að nýta ruslið til að skapa eitthvað flott eða nytsamlegt. Í myndunum hér fyrir neðan eru dæmi um umhverfislistaverk sem eru gerð úr efnivið sem fannst við að plokka nágrenni skólans.

Hér er sniðug síða sem útskýrir efnafræði á skemmtilegan hátt og því lofað að maður megi borða efnið í lokin. Sniðug útfærsla á þessu verkefni væri ef að nemendur fara í gegnum textann og útbúa kennsluefni þar sem þeir útskýra ferlið með eigin orðum. Til þess gætu þeir notað upptöku í ipadinu eða eitthvað sem þeir hafa ekki notað áður eins og kannski Flipgrid forritið eða Powtoon. Explain everything er líka skemmtilegt app til að útskýra það sem maður kann.

Tengill á verkefnið er hér

Eitt af því sem íslendingar elska að tala um er veðrið. En það er hægt að nýta tímann núna til að læra um veðrið og jafnvel gera skemmtilegar tilraunir og verkefni eins og vindhana.

Allt um það hér

Björgvin Ívar kennari í Langholtsskóla heldur út Youtube rás þar sem hann kennir notendum Ipada á möguleika tækjanna í skapandi vinnu. Við mælum eindregið með að nýta tímann í að tileinka sér nýja tækni og góð vinnubrögð í t.d. kvikmyndagerð.

Hér er Youtube rásin hans

Sum heimili eru með aðgang að Netflix. Þar inni eru fínt efni til að æfa ensku og svo eru þarna þættir sem hafa gott kennslufræðilegt gildi. Það eru nokkrir sem fjalla um dýr og svo eru þessir þættir:

Brainchild

Explained

The who was? show

Súrdeigsmæður eru stundum mjög gamlar en þær voru einstaklega vinsælar hjá mörgum fullorðnum um þessa páska. Krakkar geta líka bakað brauð úr súrdeigi, því að það er alls ekki svo flókið þó að það geti virst þannig. Það krefst þó þolinmæði því að það getur tekið allt að 10 dögum að fá góða mömmu. Það fyrsta sem maður gerir er að velja gott mjöl eins og blátt Kornax hveiti, lífrænt hveiti, heilhveiti- eða rúgmjöl. Á hverjum degi gefur maður mömmunni sinni að "borða". Það gæti verið eitthvað eins og dl af mjöli (má blanda tegundum) á móti dl af vatni sem er við stofuhita. Þetta hrærir maður saman (það má nota hreina putta) og geymir við stofuhita í létt-lokuðu íláti (ekki hafa lokið alveg fast á). Ekki gleyma að gefa mömmunni ykkar nafn. Það er algjört lykilatriði.

Þegar mamman ykkar er tilbúin er komið að því að baka og á netinu eru margar góðar uppskriftir af súrdeigsbrauði, pönnukökum eða jafnvel pizzum úr súrdeigi. Góða skemmtun.

Hér er ein hress sem útskýrir ferlið

Hvernig væri að læra að gera hreyfimyndir (Stop motion) og segja skemmtilega sögu eða gera tónlistarmyndband með hlutunum sem eru í kringum okkur á hverjum tíma?

Það eina sem þú þarft er síminn þinn eða ipadinn, app og hlutina sem þú ætlar að nota (kubbar, matvara, sælgæti eða bara hvað sem er sem í kringum þig).

Hér er gaur sem útskýrir hvernig maður gerir frábærar hreyfimyndir með símanum sínum.